د روسيې په اینګوش جمهوریت کې د قرآن د نړیوالو سیالیو دویم پړاؤ

ایکنا - د قرآن کریم د تلاوت او حفظ د نړیوالو سیالیو دویم پړاؤ  د ۳۲ هېوادونو د قاریانو په ګډون  سره د روسيې د اینګوش جمهوریت په پلازمېنې کې ترسره شو .

 ایکنانیوز د muslimsaroundtheworld په حواله راپور راکوي، د قرآن کریم د تلاوت نړیوالو سیالیو دویم پړاؤ  د اګست له ۱۶ څخه تر  ۱۸ (د زمري له ۲۵ څخه تر ۲۷) پورې د روسيې د اینګوش جمهوریت په پلازمېنې ماګاس کې پیل شو . دا سیالي د دغه جمهوریت د لومړي مفتي، شیخ سولامبک شاخبوتوویچ اولوئف سلام‌بیک، په یاد جوړه شوه، چې د قفقاز په سختو شرایطو کې ئې اسلامي تعلیمات خپاره کړل.

په دغو  سیالیو کې د ۳۲ هېوادونو، لکه روسيې، ترکیې، انډونیشیا، چین، عراق، ملایشیا، کینیا، جرمني، فلسطین، اردن، فرانسې، هالنډ، ایران، بحرین، ازبکستان، قرغیزستان او نورو هېوادونو څخه یو شمېر تکړه قاریانو او حافظانو ګډون درلود.

همدارنګه، د روسيې د مسلمان مېشتو جمهوریتونو او سیمو قاریان، لکه تاتارستان، باشقیرستان، چچن، اینګوشتیا، داغستان، کاباردینو-بالکاریا، اومسک او مسکو، په یوه صحنې کې راټول شوي وو، چې د ټول هېواد د مسلمانانو ترمینځ یووالي څرګندوي.

دا سیالي د ځوانانو د هڅولو، د قرآن کریم د حفظ او تلاوت او د تکړه استعدادونو د موندلو او ملاتړ لپاره جوړه شوې ده او دوه اصلي برخې لري: د قرآن کریم بشپړ حفظ او د تلاوت، ترتیل او صحیح او ښکلی قرائت.

یوه نړیواله قضاوتي ډله، چې د روسيې، سورئې، تیونس، ترکیې او عراق قاضیانو، په شمول له  کازان څخه شیخ مامون الراوي او د شریعت استاد شیخ سیف بن علي العسري، په کې شامل وو، د ګډونوالو ارزونه ئې وکړه.

رسمي پلاوي  هم د ویاړ  مېلمنو په توګه ګډون درلود، چې تر ټولو مهم ئې د تاتارستان پلاوی  و، د تاتارستان د مفتي، کامل سامیګولین، په مشرۍ، او همدارنګه نړیوال مشهور عالمان د سیالیو د کچې د لوړولو لپاره.

په پای کې، د ۵۱,۰۰۰ ډالرو په ارزښت نغدي جایزې ګډونوالو ته ورکړل شوې؛ همدارنګه، د سیالی د تنظیم کوونکي کمیټې ارزښتناکې جایزې لکه لپ‌ټاپ، سمارټ فون او ټبلیټ د حاضرینو لپاره او د بریالیو لپاره د عمرې ټکټونه د ګډون هڅولو لپاره ورکړل.

شیخ سلام‌بیک په ۱۹۳۷ کال کې د اینګوش جمهوریت په علي یورت ښار کې زېږېدلی و. هغه په پټه توګه دیني علوم زده کړل او د شافعي مکتب له مخې ئې له خپل پلار او نیکه فقه او شریعت زده کړل. هغه د ۲۰۰۸ کال د فبروري په ۱۴مه وفات شو او د کاریلیا اسلامي مرکز د هغه په نوم نومول شوی. د هغه زامنو د هغه لاره تعقیب کړه او جوماتونه، ښوونځي او د قرآن د حفظ مرکزونه ئې تاسیس کړل. د  دوي وروستۍ هڅه په اینګوش کې د قرآن نړیوالې سیالۍ پیلول وو، چې د قرآن په تدریس او حفظ او د نړۍ د مسلمانانو ترمینځ د اړیکو په جوړولو کې د هغه میراث ته درناوی کوي.

https://iqna.ir/fa/news/4300654